జిల్లా పోలీస్ కార్యాలయం

జిల్లా పోలీస్ కార్యాలయం,           

 

*• బాల కార్మిక వ్యవస్థ నిర్మూలన సామాజిక బాధ్యత..*

*• బాలలను కార్మికులుగా పనిలో పెట్టుకుంటే కఠిన చర్యలు..*

*• ఆపరేషన్ స్మైల్ – ఎక్స్ ఐలో 57 మంది బాలకార్మికులకు విముక్తి..*

*• ఆపరేషన్ స్మైల్ – ఎక్స్ ఐ టీం ను అభినందించిన జిల్లా ఎస్పీ శ్రీ చెన్నూరి రూపేష్ ఐపియస్. *

 

ఈ సందర్భంగా ఎస్పీ మాట్లాడుతూ.. ఆపరేషన్ స్మైల్ ఎక్స్ ఐలో భాగంగా గత నెల రోజులుగా అనగా తేది:01.01.2025 నుండి 31.01.2025 వరకు జిల్లాలోని వివిధ శాఖలకు చెందిన అధికారులు, సిబ్బందితో స్పెషల్ టీంలను ఏర్పాటు చేసి, అన్ని శాఖల సమన్వయంతో బాలకార్మిక వ్యవస్థను నిర్మూలించడానికి చేపట్టిన ఒక మహోత్తర కార్యక్రమమే ఆపరేషన్ స్మైల్ అని జిల్లా ఎస్పీ గారు అన్నారు. ఇప్పటికీ ప్రపంచాన్ని పట్టి పీడిస్తున్న సమస్యల్లో బాలకార్మిక వ్యవస్థ ఒకటని, కార్మికులుగా పనిచేసే 5 నుంచి 14 సంవత్సరాలలోపు పిల్లల్ని బాలకార్మికులుగా పరిగణిస్తారని అన్నారు. పిల్లలు ఎవరైనా బాలకార్మికులుగా ఉన్నారంటే వారి ప్రాథమిక హక్కులకు భంగం కలిగినట్లేనని, పరిశ్రమలు, వ్యవసాయం, తయారీ, మైనింగ్, నిర్మాణ రంగం, కర్మాగారాలలో, హోటల్స్ లో, రైల్వే, బస్ స్టేషన్‌లలో, బిక్షాటన మొదలైన రంగాలలో బాలలు కార్మికులుగా పనిచేస్తున్నారన్నారు. బాలలు కార్మికులుగా కొనసాగినట్లైతే వారి భవిష్యత్‌లో ఉన్నతమైన జీవితాన్ని గడిపేందుకు అవకాశాలు సన్నగిల్లుతాయని, వీరికి సరైన విద్య లేకపోవడం ద్వారా ఉపాధి అవకాశాలను కోల్పోతారన్నారు. పోటీతత్వంతో నిండిన ప్రస్తుత సమాజంలో అన్ని రంగాలలో రాణించాలంటే విద్యతో పాటు సరైన పౌష్టిక ఆహారం, ఆటలలో రాణించడం, తోటి విధ్యార్ధులతో పోటీపడేతత్వం తప్పనిసరి అన్నారు. కానీ బాల కార్మికులుగా నిలిచిపోవడం వలన పెద్దవారయ్యాక సరైన ఉపాధి దొరకని కారణంగా పలువురు నేరాలకు పాల్పడుతున్నారని, ఉపాధి మార్గాలు వెతుక్కునేందుకు సరైన మార్గదర్శనం, నైపుణ్యలేమి, ఆర్థిక తోడ్పాటు లేకపోవడం, వంటి కారణాల వలననే బాల నేరస్తులుగా మిగిలిపోతున్నారని, నేటి బాలలే రేపటి పౌరులని..! చిన్నారులే దేశ ప్రగతికి సోపానాలని..! కానీ అభివృద్ధిలో పరుగులు పెడుతున్న నేటి హైటెక్ యుగంలోనూ ఇంకా వెట్టిచాకిరి వ్యవస్థ చిన్నారుల బాల్యాన్ని చిదిమేస్తోందిని..! బాలకార్మిక వ్యవస్థ.. చిట్టి చేతులను చిత్ర హింసలు పెడుతోందన్నారు. 

బాల్యం ఎంతో అందమైనదని అలాంటి బాల్యం బాల కార్మిక వ్యవస్థతో వారి జీవితాంతం మానని గాయం చేస్తోందని, ఏ దేశంలోనైతే బాల కార్మికులు లేని, ఆరోగ్యవంతమైన బాలలుంటారో.. ఆ దేశం అభివృద్ధిలో ముందుంటుందని, బాల కార్మికులుగా మారడానికి ముఖ్యంగా పిల్లలు అనాధలు కావడం, కుటుంబ పేదరికం, నిరక్షరాస్యత తదితర కారణాలవల్ల బాలలు కార్మికులుగా మారుతున్నారని, కనీస అవసరాలకు సరిపడా ఆదాయం దొరకని అనేక కుటుంబాలు తమ పిల్లల్ని పనుల్లో చేర్పిస్తున్నారని, చిట్టి, చిట్టి చేతులతో పనులు చేస్తూ బతుకు బండిని లాగుతున్నారని, వారు పని చేసే చోట సరైన సమయానికి తిండి దొరకక పస్తులు ఉంటూ రోగాలపాలవుతున్నారని, బాలకార్మిక రక్కసి కబంధ హస్తాల నుంచి చిన్నారులకు విముక్తి కల్పించే లక్ష్యంతో 2014 నుండి ప్రతి ఏటా జనవరి నెలలో ఆపరేషన్ స్మైల్‌ ను, జులై నెలలో ఆపరేషన్ ముస్కాన్ పేర్లతో బృహత్తర కార్యక్రమాలను వివిధ శాఖల సమన్వయంతో పోలీస్ శాఖ పకడ్బందీగా అమలు చేస్తోందిని అన్నారు. బాల కార్మికులను పనిస్థలాల నుంచి తీసుకొచ్చి విద్యాబుద్ధులు నేర్పిస్తున్నామని, మిస్సింగ్ కేసులను చేధించి తల్లిదండ్రుల చెంతకు చేరుస్తూ.. బాధిత చిన్నారులకు బాసటగా నిలిస్తూ.., పలువిధాలుగా బాలలకు అండగా ఉంటున్నాం అన్నారు. 

బాలకార్మికులు ఎవరైనా కనిపించిన, ఎక్కడైనా పని చేస్తున్నట్లు సమాచారం ఉన్నా నేరుగా చైల్డ్‌ లైన్‌ టోల్‌ ఫ్రీ నెంబర్‌ 1098 లేదా 112 కు ఫోన్‌ చేసి ఫిర్యాదు చేయవచ్చుని అన్నారు. 18 సంవత్సరాల లోపు వయసున్న పిల్లలను ఎవరైనా వెట్టిచాకిరికి గురి చేసిన, బలవంతంగా బిక్షాటన చేయించిన, పశువుల కాపరులుగా, కిరాణం దుకాణాలు, మెకానిక్ షాపులు, హోటళ్లు, ఇటుక బట్టీలు, పౌల్ట్రీ ఫామ్ లు ఇతర ప్రదేశాలలోనూ పని చేయించడం, చట్టరీత్యా నేరం, ఎవరైనా పై చర్యలకు పాల్పడితే అట్టి వ్యక్తులపై చట్టరిత్య క్రిమినల్ కేసులు నమోదుచేయడం జరుగుతుందన్నారు. 

ఈ సంవత్సరం ఆపరేషన్ స్మైల్ – ఎక్స్ ఐ లో భాగంగా బాలలను కార్మికులుగా పెట్టుకున్న యాజమానులపై 20 కేసులను నమోదు చేసి, 50 మంది బాలలకు, 07 మంది బాలికలకు మొత్తం = 57 మందికి, బాల కార్మికులను రెస్క్యూ చేసి విముక్తి కల్పించడం జరిగిందని అందుకు కృషి చేసిన ప్రతి ఒక్క అధికారిని, సిబ్బందిని ఎస్పీ అభినందించారు.

Join WhatsApp

Join Now

Leave a Comment